Hallo Ali! Herzlich willkommen em Forum!
I hoff, Du fühlscht Dich hier wohl, au wenn manche so gar net nett sen, wenns um Türka on Moslems goht 
Mir sen aber net älle so, i hoff des merksch au!I hans neulich in moiner Teerunde khät davo, wie des isch mit dem Migrationshendergrund. I han echt dacht i ben unter reinrassige Deutsche on bei näherem Hinschaue, hän mir feschtgestellt, dass i a Randgruppe ohghör
Vom oina kam die Mutter aus Schlesien, vom ander hatte die Mutter en französischa Pass on irgendwelche andere Wurzla, on so gings weiter!
I ben vielleicht die oinzig weit on breit, die noch 100%ig deutsch isch. Obwohl.. so a weng a spanischa Oifluss... däs dät mir scho gfalla. Na hät i au was interessantes zum verzähla On mir wär na au net andauernd so kalt, gell?! Spanier hän ja bekanntlich heißes Blut hoißts doch! On die könnet tanza! Hän au emmer so sche Kleider oh, en älle Farba Die Männer hän so enge Hosa oh.. oifach herrlich. Aber i koh nur mit dem Erwin herhalta.. des war mei Ururgroßvater.. der oinzig, der je aus osrer Familie Berühmtheit erlangt hat. On des au bloß, weil der so gute Ackergäul züchtet hat
Da sen se sogar vo überall herkomma, um so en Gaul zum kaufa. Wenn de mit doim Gaul in Russland onderwegs warsch, on hasch jemand troffa.. hasch bloß uff d´Gaul zeiga müssa on saga "Erwin!". Däs war na emmer a fescht.. a echter Erwin.. des war wie der Porsche unter de Ackergäul On jeder isch glei in Erstauna on Ehrfurcht ausbrocha. Aber da han i ja nix davon.. heut kann ich "Erwin" saga so viel i will.. s´brengt nix Vielleicht werd ja i berühmt
Mit moim Putzingrich Na han i emmer no koin Migrationshendergrund, aber ebbes zum Verzähla Grüßle
Euer
Ernala
PS: Bleibet sche sauber! Emmer sche putza, gell?!