Alles gute zom Oschterfescht!

Ingeborch Schmittseifer und Erna Pritschibilski im Dialog
Feuilleton des GdW

Moderator: Forenteam

Antworten
Erna_Pritschibilski
ohne_Glied
Beiträge: 107
Registriert: 24.02.2008, 00:59

Alles gute zom Oschterfescht!

Beitrag von Erna_Pritschibilski » 21.03.2008, 18:17

Wünsch i euch! Sozumsaga.. Häppy Ischtern! :)

Heutzumtag macht ma ja an Oschtern scho Geschenke, wia an Weihnachta! I han des jetzt so richtig festgschtellt. :roll: War doch so noch früher so net üblich! Da hots Schokolade gebba, on vielleicht en klois Autole!

Aber gut! I han mir dann geschtern au selbscht en Oschtergeschenk gmacht. Ha ja! Brauch i auch für die Arbeit. Insofern isch des ja au net nur Vergnüga. Also ben i en die Parfümerie ganga, on han mir da en Parfüm ausgsucht. Brauch i ja au für mein Putzingrich! Logisch! Hat mir mei Mänäger erklärt, dass es au wichtig für die Arbeit vor der Kamera isch, sich en seiner Haut wohl zom fühla. Däs glaub i!

Wie au emmer... i han mir also en Parfüm kauft, on han denkt i probier des gleiamol. On na ben i in die Kanne, en Viertele schloza. Da han i na den Erwin troffa. Dr hot mi komisch ohguckt.. on na sagt der plötzlich.. "Ernale, Du riechsch so ohziehend!" on verdreht no so d´Auga!
"Erwin!" han i gsait " jetzt fängsch abr nets spinna oh! Mir kennet os seit hondert Jahr! Mir brauchsch also so net komma!" Der war abr schlagartig wieder uffem Boda der Tatsacha!
Viertel Stond später kommt der Malerhorscht on guckt mi au mit so verdrehte Auga oh.. on sagt: "Ernale.. Du riechsch abr gut!"

I ben na ganga! Da sieht ma wieder amole, dass dr Mensch no emmer primitiv isch wie a Tier! Mir besprühet os mit künschtliche Lock- on Duftmittele, die die Induschtrie vermutlich auf hochwissenschaftlicher Ebene ausgeteschtet hat, on die beim Mensche niedere Inschtinkte ohsprechet! Die hän mir selbscht garnemme wahrgnomma! Die waret wie betäubt!

Ma muss sich des mal überlege, wie ma do die Menscha manipuliera koh! Allei so a Parfümle reicht scho aus, on dei gegenübr isch Wachs in deine Händ! S´isch erschreckend! Muss ma mal weiterspinna! Wemmer sich zom Boispiel verlieba tut.. weiß ma na wirklich, ob ma nur betäubt war, oder ob ma den Menscha wirklich liebt?

Wobei... des lässt sich leicht austeschta... muss der ander oifach mal´s Parfüm wechsle.. wenn´s Gefühl der Liebe na weg isch, woiß ma Bscheid! :)

Also des Fläschle hat so um die 40 Euro koscht.. muss scho saga.. dafür was es koh, wars scho echt billig! :) I werds mir gut eiteila! ;)

Grüßle on a schehs Oschterfescht!

Euer
Ernale

Antworten