Ich tät jetzt net saga, dass des ohbedengt falsch wär. Wisse mir´s? Könne mer au net ausschließa, odr? Bei dem, was älles bassiert im Moment, könnt ma scho meina s´gäb Dämona, dia Besitz vo os nemma könnet.
Also i könnt mir vorstella, dass dr oine odr andre.. ha ja.. denket mol! Wenn däs stimma tät! Däs würd viel erklära! Im Grond gnomma wär däs sogar ebbes guats! Ma könnt älles Übel dieser Welt beseitiga.. nuur mit Exorzischta! S´wär so oifach! 
So ebbes isch abr au nur für die Schpirituellen ebbes.. ha ja.. wer hot denn dia Zeit sonscht, mit so ebbes sei Zeit zu verbringa?
Wia könnt ma sonscht mit dem im normala Leba ebbes ohfanga? ok.. ma könnts mal teschta, on soim Chef en Exorzischta schicka, wenn der koi Gehaltserhöhung geba möcht
S´wär en Versuch wert! On älles mit voller Legitimation vo dr Kirch! Dia denket net, dass ma en Sprong in dr Schüssel hot, noi! I han dacht dr Ratzinger isch vo dieser Welt.. noi.. entweder isch er aus der Vergangenheit, odr er isch vo dr Zukunft! hu nos, wie ma so scheh sait
Vielleicht isch er abr au nur äußerscht clever? I moin.. hmm.. lasset mi mol nachdenka.. also 3000 1-Euro-Jobber für den Vatikan? 
Heut isch älles möglich! Grüßle
Euer
Ernale
